Ar hyn o bryd dwi’n trio peidio bwyta gymaint o gig, felly dyma greu rysáit llysieuol blasus yr wythnos yma. Nes i ddefnyddio lentils gwyrdd gan fy mod i’n teimlo eu bod yn mynd yn llai stwnshlyd na rhai coch!

I fwydo 6:

Cynhwysion:

1 Foronen

1 Pupur Coch

1 Nionyn

1 Coesyn Seleri

1 Llwy fwrdd o Olew Olewydd

100g o domatos (baby plum am eu bod nhw’n felys)

2 dun 400g o domatos wedi eu torri’n fân

1 llwy fwrdd o biwrî tomato

2 lwy fwrdd o oregano

200g o lentils gwyrdd

500ml o stoc llysiau

80ml o win coch (opsiynol)

Halen a Phupur

Dull:

1. Torrwch y foronen, pupur coch, nionyn, garlleg a seleri’n ddarnau mân.
2. Cynheswch yr olew mewn sosban fawr a ffrïwch y llysiau am chwarter awr, tan eu bod yn dechrau meddalu.
3. Torrwch y tomatos yn hanner a’u hychwanegu i’r sosban.
4. Ychwanegwch y tuniau tomatos, y piwrî, oregano, lentils a stoc llysiau a’i gymysgu.
5. Trowch y gwres i fyny yn uchel ac ychwanegu’r gwin coch, gadewch iddo ferwi am ryw 10 munud, cyn troi’r gwres i lawr. Ychwanegwch faint fynnoch o halen a phupur.
6. Gadewch i’r cyfan fudferwi am ryw 45 munud.
7. Gweinwch â phasta.

Gallwch baratoi’r ragu gwpl o ddiwrnodau o flaen llaw o y mynnwch, mae’r un mor flasus wedi ail dwymo.