Dyma rysait (ddim yn siwr os alla i ei alw’n rysait am ei fod mor syml!) am salad nwdls syml sydd ddim yn cymryd llawer i’r baratoi a ddim yn golygu llawer o goginio!  Mae’n cadw yn yr oergell am ychydig ddiwrnodau, ac yn gret ar gyfer bocs bwyd.

Digon i 4

Cynhwysion:

2 stecen (nes i ddefnyddio syrlwyn, ond gallwch ddefnyddio unrhyw doriad).

25g Cnau Cashew

1 llwy fwrdd o halen

1 llwy fwrdd o bupur

1 llwy fwrdd o olew sesame

1 Foronen wedi ei philio

1 Pupur Coch

1 Sibwn

90g o nwdls vermichelli

I wneud y dresin:

3 llwy fwrdd o damarind neu saws soy

1 llwy fwrdd o fêl

1 llwy fwrdd o saws pysgod

Sudd ½ leim

 

Dull:

1. Paratowch y dresin trwy gymysgu’r tamarind (neu saws soy), mêl, saws pysgod a sudd leim.
2. Sleisiwch y foronen, pupur a shibwn.
3. Cynheswch y radell a ffrio’r ddwy stecen fel y dymunwch, dwi’n eu coginio am 3 munud pob ochr. Gadewch i’r ddwy stecen orffwys wedi i chi eu coginio.
4. Rhowch y nwdls i socian mewn dŵr berwedig. Dilynwch y cyfarwyddiadau ar y paced, mae’r cyfarwyddiadau coginio yn wahanol yn ddibynnol ar frand y nwdls.
5. Cynheswch badell ffrio ac ychwanegwch yr olew, halan a phupur.       Wedi i’r badell gynhesu ychwanegwch y cnau cashew a’u ffrio tan eu bod yn dechrau brownio.
6. Sleiswich y ddwy stecen a’u cymysgu gyda’r moron, pupur, sibwn, nwdls a’r cnau, a thaenwch y dresin dros y cyfan.