Dyma rysáit perffaith ar gyfer swper yn ystod yr wythnos. Os nad ydych chi ffansi salad, byddai’n gweithio’n grêt gyda reis neu nwdls hefyd!

 

Cynhwysion:

3 llwy fwrdd o saws soy

2 lwy fwrdd o fêl

Darn 1cm o sinsir ffres

Sbrig o deim

½ bresychen goch fach

1 Moronen fawr

1 Shibwn spring onion

1 tsili coch

10 o ddail mintys

2 glun cyw iâr mawr, neu 4 o rai bach

Sudd ½ leim

100g o ffa Edemame

Halen

Pupur

1 llwy fwrdd o Olew Olewydd

 

Dull:

1. Gratiwch y sinsir yn fân cyn ei gymysgu mewn powlen â’r saws soy a’r mêl. Ychwanegwch ddail y sbrig o deim.
2. Rhowch y cyw iâr ar hambwrdd bobi, a thywallt y saws dros ben y cyw iâr. Gorchuddiwch â cling film a’i roi yn yr oergell am o leiaf dwy awr.
3. Cynheswch y popty i 190gradd. Tynnwch y cyw iâr o’r oergell a thaenu unrhyw saws sydd ar waelod yr hambwrdd dros y cyw iâr, a’i roi yn y popty am 35 munud.
4. Gratiwch y fresychen, a’r foronen a sleisiwch y tsili a’r shibwn. Torrwch y mintys yn fân. Cymysgwch y cyfan mewn powlen ac ychwanegwch y ffa edamame, olew olewydd a faint fynnwch o halen a phupur.
5. Cyn gweini arllwyswch y sudd leim ar y cyfan.