Mae’r cyri yma’n flasus ac yn hawdd iawn i’w wneud! Cyw iâr fydda i’n ddefnyddio, ond mae’n gweithio’n dda hefo chickpeas yn unig os ydych chi’n llysieuwr/dim ffansi cig.

 

Cynhwysion;

1 nionyn wedi ei dorri’n fân

1 tsili coch wedi ei dorri’n fân

2 ewin garlleg wedi eu torri’n fân

darn bach o sinsir (tua 2 cm) wedi’i gratio

400 ml o stoc cyw iâr

1 llwy de o fêl

1 llwy de o turmeric

1 llwy de o bowdr cyri

1 llwy fwrdd o biwrî tomato

1 tin 400g o chickpeas (heb y sudd)

2 goes cyw iâr (opsiynol)

Llond llaw o sbigoglys/spinach

Halen a Phupur

Dull;

1. Os am ychwanegu cyw iâr ffriwch y cyw iâr mewn ychydig o fenyn tan yn frown. Wedi i’r cyw iâr frownio tynnwch allan o’r sosban.
2. Gadewch y sosban ar y gwres a ffriwch y nionyn, garlleg tsili a sinsir am funud.
3. Ychwanegwch y powdr cyri, mêl, turmeric  a’r piwrî tomato a’i ffrio am funud.
4. Arllwyswch 400ml o stoc cyw iâr i’r sosban. Gallwch ychwanegu llai neu fwy o stoc, dibynnu pa mor drwchus ydych chi’n hoffi saws y cyri.
5. Ychwanegwch y chickpeas.
6. Rhowch y cyw iâr yn ôl yn sosban efo’r saws.
7. Coginiwch ar wres isel am tua hanner awr. Ychwanegwch halen a phupur os oes angen.
8. Ychwanegwch lond llaw o sbigoglys tua 5 munud cyn gweini.

Cofiwch wneud yn siŵr bod y cyw iâr wedi ei goginio drwyddo cyn ei weini! Gallwch ei weini â reis brown neu reis blodfresych.