Mae cêl (Saesneg: Kale) yn uffernol o dda i chi – llawn maeth ac yn flasus os wyt ti’n ei baratoi yn iawn. Mae’n hawdd dod o hyd i fag o gêl mewn archfarchnadoedd dyddiau yma. Nesi ddod fyny efo’r ryseit yma i fynd efo’r BFC. Dwi hefyd yn defnyddio iogwrt yn hytrach na mayonnaise i’w wneud yn ysgafnach ac yn iachach. 

Cynhwysion (digon i fwydo 4)

3 lond llaw o Gêl – Wedi’u stripio o’u coesynnau caled a’u sleisio’n fân

¼ Bresych Coch – Wedi’u sleisio yn fân

3 x Sbring Yniyns / Shibwns / Spring Onions – Wedi’u sleisio yn fân

1 x Moronsen – Wedi’i gratio

2 lwy fwrdd o hadau cymysg (pumkin, sunflowyr ayyb) wedi’u tostio mewn padell ffrio sych

2 lwy bwdin o Iogwrt Naturiol – dwi’n hoff iawn o gynnyrch Llaeth y Llan

Finegr Seidr / Gwin Gwyn Organig – 2 lwy bwdin

Halen a Phupur

Dull:

1. Rho’r cêl mewn powlen fawr gyda’r finegr a phinsiad o halen a phupur. Cer ati i wasgu’r finegr a’r halen i mewn i’r cêl er mwyn meddalu fo ychydig a’i wneud yn haws i fwyta. Mae hwn yn gam pwysig.
2. Ychwanega’r gweddill y cynhwysion a’u cymysgu’n dda.
3. Blasu i weld os oes angen fwy o halen neu finegr.